LHC0088 • 2025-10-16 03:51:23 • views 1254
കോഴിക്കോട്∙ കാലിക്കറ്റ് സർവകലാശാല ക്യാംപസിൽ നടന്ന ഡിപ്പാർട്മെന്റ് യൂണിയൻ തെരഞ്ഞെടുപ്പ് റദ്ദാക്കാനും, തിരഞ്ഞെടുപ്പ് ഫലം പ്രഖ്യാപിച്ച ഡിപ്പാർട്ട്മെന്റ് യൂണിയനുകളുടെ പ്രവർത്തനം തൽക്കാലം നിർത്തിവയ്ക്കാനും വൈസ് ചാൻസലർ ഡോ.പി. രവീന്ദ്രൻ ഉത്തരവിട്ടു. തിരഞ്ഞെടുപ്പ് സംഘർഷത്തിൽ വിശദമായ അന്വേഷണത്തിന് സീനിയർ അധ്യാപകരുടെ കമ്മിറ്റിയും വിസി രൂപീകരിച്ചു.
- Also Read വോട്ടർ പട്ടികയിലെ ക്രമക്കേട് ഡിപ്പാർട്മെന്റൽ സ്റ്റുഡന്റ്സ് യൂണിയൻ തിരഞ്ഞെടുപ്പ് നീളും
വിദ്യാർഥി യൂണിയൻ തിരഞ്ഞെടുപ്പിലെ സംഘർഷത്തെ തുടർന്ന് ക്യാംപസ് അടച്ചിട്ടിരിക്കുകയാണ്. വോട്ടെണ്ണൽ നിർത്തിവയ്ക്കാനുള്ള വിസിയുടെ നിർദേശം അനുസരിച്ച് ബാലറ്റ് പേപ്പറുകൾ യൂണിവേഴ്സിറ്റിയിൽ സീൽ ചെയ്ത് സൂക്ഷിച്ചിരിക്കുകയാണ്. സീരിയൽ നമ്പറും റിട്ടേണിങ് ഓഫിസറുടെ ഒപ്പും പതിക്കാതെ ബാലറ്റ് പേപ്പറുകൾ നൽകിയത് വോട്ടിങ്ങിൽ കൃത്രിമം കാണിക്കാനാണെന്ന ഒരു വിഭാഗം വിദ്യാർഥികളുടെ പരാതിയാണ് സംഘർഷത്തിൽ കലാശിച്ചത്. പരാതിയിൽ ബന്ധപ്പെട്ടവരിൽ നിന്ന് വിസി വിശദീകരണം തേടിയിരുന്നു.
- Also Read വോട്ടെണ്ണലിനിടെ സംഘർഷം; ഡിഎസ്യു ഫലപ്രഖ്യാപനം വിസി തടഞ്ഞു
തുടർന്നാണ്, തിരഞ്ഞെടുപ്പ് നടപടികൾ സുതാര്യമാകുന്നതിന് സിൻഡിക്കേറ്റ് അംഗീകരിച്ച ചട്ടങ്ങൾക്ക് വിരുദ്ധമായി നടത്തിയ വോട്ടെടുപ്പ് റദ്ദാക്കാൻ വിസി ഉത്തരവിട്ടത്. അതോടൊപ്പം യൂണിവേഴ്സിറ്റിയുടെ സാറ്റലൈറ്റ് ക്യാംപസുകളായ ഐ.ടി.എസ്.ആർ ചെതലയം, ജോൺ മത്തായി സെൻറർ തൃശൂർ, ഇൻസ്റ്റിറ്റ്യൂട്ട് ഓഫ് എൻജിനീയറിങ് ആൻഡ് ടെക്നോളജി - ഐ.ഇ.ടി എന്നിവിടങ്ങളിൽ വിജയികളായ യൂണിയൻ ഭാരവാഹികളുടെ പ്രവർത്തനം തൽക്കാലം നിർത്തി വയ്ക്കാനും വിസി നിർദേശം നൽകി.
- Also Read കാലിക്കറ്റ് യൂണിയൻ തിരഞ്ഞെടുപ്പ്: വിജയം അവകാശപ്പെട്ട് യുഡിഎസ്എഫും എസ്എഫ്ഐയും
തിരഞ്ഞെടുപ്പുമായി ബന്ധപ്പെട്ട് നടന്ന അക്രമ സംഭവങ്ങൾ ഉൾപ്പെടെ അന്വേഷിച്ച് റിപ്പോർട്ട് സമർപ്പിക്കാൻ സീനിയർ അധ്യാപകരടങ്ങുന്ന അഞ്ചംഗ കമ്മിറ്റിയെ വിസി നിയോഗിച്ചിട്ടുണ്ട്. പത്തു ദിവസത്തിനുള്ളിൽ കമ്മിറ്റി റിപ്പോർട്ട് സമർപ്പിക്കണം. ഡോ. സന്തോഷ് നമ്പി ചെയർമാനായ കമ്മിറ്റിയിൽ ഡോ. എ.എം.വിനോദ് കുമാർ, ഡോ.എൻ.മുഹമ്മദ് അലി, ഡോ.പ്രീതി കുറ്റിപുലക്കൽ, ഡോ. കെ.കെ.ഏലിയാസ് എന്നിവർ അംഗങ്ങളാണ്. ക്യാംപസ് അടച്ചിടാനിടയായ സാഹചര്യം വിശദീകരിക്കാൻ ഗവർണർ ആവശ്യപ്പെട്ടതനുസരിച്ച് വിസി കഴിഞ്ഞ ദിവസം തൃശ്ശൂരിൽ വച്ച് ഗവർണറെ കണ്ടു ചർച്ച നടത്തിയിരുന്നു. English Summary:
VC Cancels Calicut University Students Union Election: Calicut University election has been cancelled following student clashes. The Vice Chancellor has ordered an investigation and temporarily suspended the activities of the elected union officials. |
|
