സ്വർണപ്പാളി: സർക്കാരിന് ഓർക്കാപ്പുറത്ത് തിരിച്ചടി; അന്വേഷണ സംഘത്തെ നിയോഗിച്ച് പിടിമുറുക്കി ഹൈക്കോടതി

deltin33 · 2025-10-28 09:10:22

തിരുവനന്തപുരം ∙ തിരഞ്ഞെടുപ്പിന്റെ പടിവാതിൽക്കൽ സംഘടിപ്പിച്ച ആഗോള അയ്യപ്പസംഗമം രാഷ്ട്രീയ നേട്ടമായെന്നു കരുതിയ സർക്കാരിനും എൽഡിഎഫിനും ഓർക്കാപ്പുറത്തു വൻ തിരിച്ചടിയായി ശബരിമലയിലെ സ്വർണപ്പാളി വിവാദം. കഴിഞ്ഞ എൽഡിഎഫ് സർക്കാരിന്റെ കാലത്തു നടന്ന സ്വർണത്തട്ടിപ്പിന്റെ ഞെട്ടിക്കുന്ന വിവരങ്ങൾ പുറത്തുവരുമ്പോൾ പ്രതിരോധിക്കാൻ പോലുമാകാത്ത അവസ്ഥയിലാണ് സർക്കാരും മുന്നണിയും. തട്ടിപ്പ് പുറത്തുവരാൻ നിമിത്തമായ ഇടപെടൽ നടത്തിയ ഹൈക്കോടതി തന്നെ, നേരിട്ടുള്ള മേൽനോട്ടത്തിൽ ഉന്നതതല അന്വേഷണ സംഘത്തെ നിയോഗിച്ചു പിടിമുറുക്കിയതും സർക്കാരിനെ പ്രതിരോധത്തിലാക്കുന്നു.

Also Read ശബരിമല അറ്റകുറ്റപ്പണികൾ: 2023 മുതൽ കോടതി അനുമതി നിർബന്ധം

ആഗോള അയ്യപ്പ സംഗമത്തെ പ്രതിപക്ഷ കക്ഷികൾ എതിർത്തപ്പോഴും ശബരിമല യുവതീപ്രവേശ വിഷയത്തിൽ ഇടഞ്ഞുനിന്ന പലരെയും തങ്ങളുടെ പക്ഷത്തേക്ക് അടുപ്പിക്കാനായെന്ന് ഇടതുമുന്നണി വിലയിരുത്തിയിരുന്നു. എന്നാൽ, തൊട്ടുപിന്നാലെ സ്വർണത്തട്ടിപ്പ് പുറത്തുവരുമ്പോൾ വീണ്ടും വിശ്വാസ പ്രശ്നത്തിന്റെ ഊരാക്കുടുക്കിലാവുകയാണ് സർക്കാർ.

1999 ൽ ശബരിമല ക്ഷേത്രത്തിൽ ദ്വാരപാലക ശിൽപങ്ങളിലടക്കം സ്വർണപ്പാളികൾ പതിച്ചിരുന്നതായി ദേവസ്വം മഹസറിൽ തന്നെ വ്യക്തമാക്കുന്നുണ്ട്. എന്നാൽ 2019 ൽ പാളികൾ അറ്റകുറ്റപ്പണിക്കെന്ന പേരിൽ ഇളക്കിയെടുത്ത് ചെന്നൈയ്ക്കു കൊണ്ടുപോയപ്പോൾ അതിലെ സ്വർണം നഷ്ടപ്പെട്ടത് എങ്ങനെയെന്നതിൽ ബോർഡിനോ സർക്കാരിനോ ഉത്തരമില്ല.

സ്വർണപ്പാളികൾ ഉണ്ണിക്കൃഷ്ണൻ പോറ്റിയെന്ന ഇടനിലക്കാരന് യഥേഷ്ടം കൈകാര്യം ചെയ്യാൻ അവസരമൊരുക്കിയതിന് അന്നത്തെ ദേവസ്വം മന്ത്രിയും ബോർഡ് പ്രസിഡന്റും ഉദ്യോഗസ്ഥരെ പഴിചാരുന്നു. എന്നാൽ, ഉദ്യോഗസ്ഥർ മാത്രം വിചാരിച്ചാൽ ഒരു സ്വകാര്യ വ്യക്തിക്ക് ശബരിമലയിലെ സ്വർണപ്പാളികൾ ഇളക്കിയെടുത്ത് കൊണ്ടുപോകാനും ഒരു മാസത്തിലേറെ പലയിടത്തുമെത്തിച്ച് ഇഷ്ടം പോലെ കൈകാര്യം ചെയ്യാനും സാധിക്കുമോ എന്നതാണു പ്രസക്തമായ ചോദ്യം.

അന്ന് അറ്റകുറ്റപ്പണിക്കു ശേഷം 40 വർഷ വാറന്റി വാങ്ങിയത് ഉണ്ണിക്കൃഷ്ണൻ പോറ്റിയുടെ പേരിലാണെന്നതും ശബരിമല ശ്രീകോവിലിലെ വാതിൽ നവീകരണത്തിനും ഇതേ വ്യക്തി ഇടനിലക്കാരനായെന്നതും ദുരൂഹമായി തുടരുന്നു. 6 വർഷം മുൻപ് അറ്റകുറ്റപ്പണി ചെയ്ത പാളികൾ ഇപ്പോൾ ഹൈക്കോടതി നിയോഗിച്ച ശബരിമല സ്പെഷൽ കമ്മിഷണറെപ്പോലും അറിയിക്കാതെ വീണ്ടും ഇളക്കി ഇതേ വ്യക്തിയെ തന്നെ ഏൽപിച്ചതും സംശയ നിഴലിലാണ്.

ശബരിമലയിലെ വിശ്വാസ പ്രശ്നത്തിനൊപ്പം തട്ടിപ്പുകൾ കൂടി പുറത്തുവരുമ്പോൾ വിശ്വാസികളും പിന്തുണയ്ക്കുന്നവരും അതിനെ എങ്ങനെ കാണും എന്നതാണ് എൽഡിഎഫിനെ ആശങ്കയിലാക്കുന്നത്. ഹൈക്കോടതി മേൽനോട്ടത്തിലുള്ള അന്വേഷണവും അവരുടെ ചങ്കിടിപ്പേറ്റുന്നു.

ബോർഡിന്റെ വീഴ്ച സമ്മതിച്ച് മന്ത്രി വാസവൻ

തിരുവനന്തപുരം ∙ ശബരിമലയിലെ സ്വർണപ്പാളി 2019 ൽ സ്വർണം പൂശാൻ കൊണ്ടുപോയപ്പോൾ ദേവസ്വം ബോർഡ് ഉദ്യോഗസ്ഥർ അനുഗമിക്കാത്തത് വീഴ്ചയാണെന്ന് മന്ത്രി വി.എൻ.വാസവൻ. ഇക്കാര്യത്തിൽ അടക്കം സർക്കാരിനെയോ മന്ത്രിയെയോ കുറ്റപ്പെടുത്തിയിട്ടു കാര്യമില്ല. ശബരിമലയിലെ ദൈനംദിന വിഷയങ്ങൾ കൈകാര്യം ചെയ്യുന്നത് ദേവസ്വം ബോർഡാണ്. ബോർഡിന് ആവശ്യമായ സഹായങ്ങൾ ചെയ്യുക മാത്രമാണു സർക്കാരിന്റെ ജോലി.

അയ്യപ്പസംഗമത്തിന്റെ ചെലവ് സ്പോൺസർമാരിൽനിന്നു തന്നെ കണ്ടെത്തും. സ്പോൺസർഷിപ് തുക ഇതുവരെ ശേഖരിച്ചിട്ടില്ല. 45 ദിവസത്തിനുള്ളിൽ വരവു ചെലവു കണക്കുകൾ പരസ്യപ്പെടുത്തണമെന്നാണ് കോടതി പറഞ്ഞിട്ടുള്ളത്. കണക്കെടുപ്പ് പൂർത്തിയായിട്ടില്ലെന്നും കണക്കു പരസ്യപ്പെടുത്തുമ്പോൾ ദേവസ്വം ബോർഡിനു ബാധ്യത വരില്ലെന്നും മന്ത്രി വ്യക്തമാക്കി.

അയ്യപ്പസംഗമത്തിനു 3 ദിവസം മുൻപ് ഉണ്ണിക്കൃഷ്ണൻ പോറ്റി നടത്തിയ വെളിപ്പെടുത്തലാണ് ഇൗ വിവാദങ്ങൾക്കു തുടക്കം. അതുകൊണ്ടാണ് ഇതിനു പിന്നിൽ ഗൂഢാലോചനയുണ്ടെന്നു സംശയിക്കുന്നത്. ഹൈക്കോടതി പ്രഖ്യാപിച്ച അന്വേഷണത്തെ സർക്കാർ സ്വാഗതം ചെയ്യുന്നു. വിജയ് മല്യ സ്വർണം കൈമാറിയതു മുതലുള്ള എല്ലാ ഇടപാടുകളും അന്വേഷിക്കണമെന്നും മന്ത്രി പറഞ്ഞു. English Summary:
Sabarimala Gold Plate Controversy: Sabarimala gold plating scam investigation initiated by the High Court has caused a major setback for the Kerala government. The investigation focuses on the alleged irregularities in the gold plating of the Sabarimala temple doors. The High Court\“s direct involvement in the investigation highlights the seriousness of the matter.

		Remember me	Forgot password?
Password			Register now

സ്വർണപ്പാളി: സർക്കാരിന് ഓർക്കാപ്പുറത്ത് തിരിച്ചടി; അന്വേഷണ സംഘത്തെ നിയോഗിച്ച് പിടിമുറുക്കി ഹൈക്കോടതി

Related threads

Post a reply

Previous / Next

Explore interesting content

Viewed forums

New post